وزیراعظم عمران خان دا پارلیمنٹ دے سانجھے اجلاس نال خطاب

اسلام آباد ۔ 6 اگست (اے پی پی) وزیراعظم عمران خان آکھیا جو بھارت ولوں کشمیر دی خصوصی حیثیت ختم کرنڑ دا اعلان نریندر مودی دے انتخابی منشور دا حصہ ہئی ،اے او نظریہ اے جئیں دا منڈھ آر ایس ایس رکھی جئیں دا مقصد بھارت اچ ہندوراج قائم کرنڑ ہئی ،اساں خلوص نیت نال بھارت سمیت سارے ہمسائے ملکاں نال تعلقات معمول تے گھن تے آونڑ دی کوشش کیتی،بشکیک سربراہ اجلاس دے موقع تے اساکوں اندازہ تھی گیا ہئی جو بھارت گالھ مہاڑ کرنڑاچ سنجیدہ کائنی اتے او ایں پیشکش کوں اساڈی کمزوری سمجھدا پئے۔منگل کوں پارلیمنٹ دے سانجھے اجلاس اچ بھارت ولوں بھارتی دستور دے آرٹیکل370اتے 35الف دی تنسیخ نال بھارتی مقبوضہ کشمیر دی متنازعہ حیثیت کوں تبدیل کرنڑ دی غیر قانونی اتے جابرانہ کوشش لائن آف کنٹرول تے بلااشتعال فائرنگ،کلسٹر بماں دا استعمال اتے مقبوضہ کشمیر اچ کیتے ونجنڑ آلے مظالم بارے پیش کیتی تحریک تے پالیسی بیان ڈیندیں ہوئیں وزیراعظم آکھیا جو اج دے سانجھے سیشن دی اہمیت کوں سمجھڑاں چاہیدے۔اے سیشن صرف پاکستا ن یا کشمیر نی پوری دنیا ڈیکھدی پی اے۔اج اتھوں اے سنھیا ونجڑاں چاہیدے جو پوری قوم ایں معاملے تے کٹھی اے۔ایں سیشن کوں کشمیریاں اتے پاکستانیاں سانگے نی اوندے اثرات ساری دنیا تئیں ویسن۔وزیراعظم آکھیا جو جئیں ویلھے اساڈی حکومت آئی تاں اوں ویلھے اساڈی ترجیح غربت مکاونڑ اتے خطے دی ترقی ہئی ایں سانگے اساں فیصلہ کیتا جو اساں ہمسائے ملکاں نال چنگے تعلقات سانگے رابطے کیتے ونجن کیونجو کشیدگی ودھدی اے تاں ایں دا اثر شرح نمو تے منفی اثر پمدے،اتے ایں نال معیشت متاثر تھیندی اے اتے غربت ودھدی اے۔اساں بھارت کوں آکھیا جو او امن سانگے ہک قدم ٹر تے آوے اساں ڈو قدم اگوں ودھیسوں۔انہاں آکھیا جو امریکہ دا اجوکا دورہ وی ایں سانگے ہئی جو پاکستان ترقی کرے۔اتھاں شرح نمو ودھے اتے لوکاں کوں غربت اچوں کڈھوں۔انہاں آکھیا جو ایں بارے صدر ٹرمپ توں درخواست کیتی جو او کشمیر دے مسئلے تے ثالثی کرن۔انہاں آکھای جو مودی نال جئیں ویلھے گالھ تھئی تاں انہاں اپنڑے خدشات دا اظہار کیتا جو پاکستان اچ ٹریننگ کیمپ ہن ،میں انہاں کوں سمجھایا جو جڈاں پشاور اچ آرمی سکول تے دہشت گرداں حملہ کیتا تاں اوں ویلھے پوری قیادت کٹھی تھی کراہیں قومی ایکشن پلان شروع کیتا اتے اے گالھ طے تھئی جو کوئی وی دہشت گردی پاکستان دی زمین استعمال کائنا کر سگسن۔اساں ڈٹھا جو بھارت گالھ مہاڑ اچ سنجیدہ کائنی ولا امریکہ تے اے گالھ بئی نشابر تھی گئی ،او پاکستان کوں قربانی دا بکرا بنڑاونڑ چاہندا ہئی ۔