اسلام آباد۔2نومبر(اے پی پی) اسپیکر قومی اسمبلی سردار ایاز صادق صحافیاں دے خلاف جرائم مکاوݨ دے جگ ݙیھاڑ تے آپݨے سنھیے اچ آکھیے صحافت کوں ریاست دا اہم ستون اتے جمہوریت دا بنیادی جزو منیا ویندے ،جمہوری اتے انصاف پسند معاشرے دی تشکیل سانڳے صحافی برادری دے خلاف تھیوݨ آلے جرائم مکاوݨ ناگزیراے، ہر سال پوری دنیا اچ صحافیاں کوں تشدد دا نشانا بݨایا ویندے ، سینکڑاں صحافی اپݨی پیشہ وارانہ ذمہ واریاں نبھیندے ہوئیں شہید تھیندن۔ قومی اسمبلی سیکرٹریٹ ڈائریکٹوریٹ جنرل آف میڈیا توں ہفتے کوں جاری بیان اچ سردار ایاز صادق آکھیے جمہوری اتے انصاف پسند معاشرے دی تشکیل سانڳے صحافی برادری دے خلاف تھیوݨ آلے جرائم مکاوݨ ناگزیر اے ۔ انہاں آکھیے غزہ اتے مقبوضہ کشمیراچ صحافیاں کوں بدترین ریاستی دہشتگردی دا نشانہ بݨایا ویندا پئے ۔ اسپیکر قومی اسمبلی مطالبہ کیتے جو اقوام متحدہ غزہ تے بھارت اچ صحافیاں تے تھیوݨ آلی دہشتگردی اتے جرائم دا نوٹس گھنے۔ انہاں آکھیے پاکستان دی پارلیمان ہمیشہ صحافیاں داتحفظ یقینی بݨاوݨ اچ بھر پور کردار ادا کیتے،پارلیمان آزادی صحافت اتے صحافیاں دے حقوق دے تحفظ تے یقین رکھیندی اے ۔سپیکر آکھیے میڈیا دی آزادی اتے صحافیاں دے حقوق دے تحفظ سانڳے ہر فورم تے آواز چیندے رہسوں۔
