آپݨے سارے اعمال کوں نبی پاک ؐ دی سیرت موجب ڈھالݨ ساݙی اولین ترجیح ہووݨی چاہیدی اے ،احسن اقبال دا سیرت کانفرنس توں خطاب

اسلام آباد۔20ستمبر(اے پی پی) وفاقی وزیر منصوبہ بندی ،ترقی ،اصلاحات و خصوصی  اقدامات احسن اقبال آکھیے آپݨے سارے اعمال کوں نبی پاک ؐ دی سیرت موجب ڈھالݨ ساݙی اولین ترجیح ہووݨی چاہیدی اے ،ساݙا عقیدہ اے جو حضرت محمد ﷺ خاتم النبیین ہن،ساݙا اسلام صرف ڳالھیں تئیں محدود اے عمل دی دنیا اچ اساں ساریں توں پچھوں ہیسے ، ،اسلام انسان کوں کائنات دے رموز تے غور کرݨ دی ہدایت ݙتی ۔ ساݙے نینگراں کوں سوشل میڈیا توں ساریں توں وݙا خطرہ اے ۔ اے ڳالھ انھاں سیرت کانفرنس اچ بطور مہمان خصوصی خطاب کریندے آکھی اے ۔ احسن اقبال آکھیے میں پروردگار دا شکر گزار ہاں جو نبیؐ دے حوالے نال تھیوݨ آلی تقریب اچ شرکت دا شرف بخشیے ۔ خدا تے مخلوق وچال کوئی قدر سانجھی نی تھی سڳدی ۔ ساݙا عقیدہ اے حضرت محمد ﷺ خاتم النبیین ہن۔ انسانیت کوں فلاح دا سنھیا پڄاوݨ دا مشن نبیؐ امت دے حوالے کیتا ۔ اڄ دنیا اچ 2 ارب مسلمان ہووݨ دے باوجود غزہ ،فلسطین، لبنان اچ روز مسلماناں دے خون دی ہولی کھیݙی ویندی اے ۔سوچݨ دی ڳالھ اے جو ساݙی امت بے وس کیوں اے۔ وفاقی وزیر آکھیے نبی کریم ؐ دی حدیث  دا مفہوم اے جو میݙی امت دے لوکاں کوں کفار ایویں نشانہ بݨیسن جیویں بُھکا دسترخوان تے پوندے کیوں جو او دنیا دی محبت اچ گرفتار تھی ویسن ۔ ساݙا اسلام صرف ڳالھیں تئیں محدود اے لیکن عمل دی دنیا اچ اساں ساریں توں پچھوں ہیسے ، اڄ دا مسلمان علم اتے عمل ݙوہیں بحران دا شکار اے۔ نبی پاک ؐ  کوں قرآن دی شکل اچ علم دا معجزہ ݙتا ڳیا ۔  قرآن کریم علم دا او شاہکار اے جیں دی لوک قیامت تئیں تحقیق کریندے رہسن ۔ انھاں آکھیے اڄ ساریں توں ودھ جہالت مسلماناں اچ اے ۔  نوبل انعام گھنݨ آلیں اچ مسلم سائنسدان شاز ونادر ہن ۔ اسلام انسان کوں کائنات دے رموزتے غور کرݨ دی ہدایت ݙتی جݙاں جو اساں آپݨی بصارت تے پردے اتے عقل کوں تالے لاݙتن ۔ چندر دی تسخیر چین، امریکا، روس اتے  بھارت کرڳھدی ۔انہاں آکھیے امریکا  دی جیمز ویب ٹیلی سکوپ اڄ خلائی تسخیر اچ پوری دنیا کوں پچھوں چھوڑ چکی اے ،سپین اچ علم دے ہر شعبے اچ مسلمان اڳوں ہن ۔ کینیڈا دی یونیورسٹی دے  مقالہ موجب ماضی اچ مسلمان دے عروج  دی وجہ اللہ تعالیٰ دی قرآن اچ کائنات کوں تسخیر کرݨ دی ہدایت ہئی ،قرآن ایں دور دے لوکاں کوں متاثر کریندا ہئی تے تاں کیا وجہ اے جو اڄ اوہو قرآن اساکوں حرکت تے مجبور نی کریندا ۔ انھاں آکھیے ہر او عمل جیں دی نبؐی تلقین کیتی ساݙا کردار ایندا عکس اے ، ملاوٹ، صفائی، کوڑ، ہر پاسے بُرا حال اے ۔ نبی کریم ؐنال  محبت دے عملی تقاضے پورے کرݨے چاہیدن۔ اڄ کجھ عناصر نبیؐ  دی امت کوں تفرقے دا نشانہ بݨاوݨ چاہندن انھاں آکھیے اڄ دا ساریں توں وݙا چیلنج سوشل میڈیا اے ۔ سوشل میڈیا دے ذریعے سوکھیں سچ کوں کوڑ تے کوڑ کوں سچ بݨا تے پیش کیتا ونڄ سڳدے ۔ سوشل میڈیا دے ذریعے گمراہی کھنڈائی ویندی پئی اے ساݙے نینگراں کوں سوشل میڈیا توں ساریں توں وݙا خطرہ اے ۔ اساں ھک ݙوجھے نال تشدد دے بغیر مکالمے دے ذریعے ڳالھ مہاڑ کرسڳدوں۔ اپݨے سارے اعمال کوں نبی پاک ؐ دی سیرت موجب ڈھالݨ ساݙی اولین ترجیح ہووݨی چاہیدی اے