سپیکر قومی اسمبلی پارلیمان دی بالادستی کیتے چیف الیکشن کمشنر کوں خط لکھیے، کہیں وی ادارے کوں من چاہی تشریح دا کوئی حق نئیں، وفاقی وزیر اطلاعات عطاء اللہ تارڑ

اسلام آباد۔19ستمبر(اے پی پی):وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو سپیکر قومی اسمبلی ایاز صادق پارلیمان دی بالادستی کیتے چیف الیکشن کمشنر کوں خط لکھیے، کہیں وی ادارے کوں من چاہی تشریح دا کوئی حق نئیں، آئین اچ قانون سازی اتے ترامیم دا اختیار صرف پارلیمان کولو اے۔ اے الھ ڳانہاں میڈیا نال الیندے آکھی۔ انہاں آکھیا جو سپیکر قومی اسمبلی سردار ایاز صادق دے چیف الیکشن کمشنر کوں خط تے حکومت دا موقف عوام تئیں پڄݨا چاہیدے، ایاز صادق ہک جمہوری شخصیت ہین، انہاں تحریک انصاف دے گرفتار ارکان بارے بغیر واںجھ دے رولنگ ݙتی اے اتے انہاں دے پروڈکشن آرڈر وی جاری کر تے ہک خصوصی کمیٹی وی ٻݨائی اے، سپیکر دا کردار ہمیشہ پارلیمان دی بالادستی اتے ارکان دے حقوق دے تحفظ کیتے جمہوری رہے، الیکشن کمیشنر کوں خط لکھݨ پارلیمان دی بالادستی اتے ملکی پارلیمانی تاریخ اچ ہک اہم سنگ میل اے کیوں جو قانون سازی دا اختیار صرف پارلیمنٹ کوں اے، انہاں کوں اے حق عوام چݨ تے ݙیندن۔ انہاں آکھیا جو آرٹیکل 63 اے دی تشریح دی واری حمزہ شہباز شریف دی پنجاب اچ حکومت فارغ کیتی ڳئی، لوکاں کوں ڈی سیٹ کیتے اتے ضمنی انتخابات کروائے گئن۔ انہاں آکھیا جو سپیکر قومی اسمبلی درست لکھیے جو الیکشن ایکٹ 2017 جیندے اچ ترمیم کیتی گئی اے، اچ پہلے توں اے رول موجود ہا جو آزاد امیدوار 48 گھنٹے اچ کہیں نا کہیں جماعت اچ رل سڳدن، کہیں پارٹی اچ رلݨ آلا رکن ول کہیں ٻئی جماعت اچ کیویں رل سڳدے؟ غلطی تحریک انصاف کیتی اے جیندے ارکان کوں چاہیدا ہا جو او کہین پارلیمانی جماعت اچ رلدے ٻھل انہاں سنی اتحاد کونسل اچ رل تے اپݨے پیریں تے آپ کہاڑی ماری اے۔ وزیر اطلاعات آکھیا جو سپیکر قومی اسمبلی آکھیے جو آزاد امیدوار مخصوص مدت اچ کہیں وی جماعت نال رل سڳدے، ڄیکر او کتھائیں نا رلے تاں اوکوں آزاد ہی ڳݨیا ویسی، سنی اتحاد کونسل اچ رلݨ آلے ارکان کوں تحریک انصاف اچ ونڄݨ دی اجازت کیویں ݙویڄ سڳیندی اے؟ کیا اے فلور کراسنگ نئیں؟ آرٹیکل 63 اے دی تشریح اپݨی مرضی دے مطابق کرݙتی ویندی اے ایندے اچ پارلیمان دی بالادستی دا وی خیال نئیں رکھیا ویندا، مخصوص نشستاں دے معاملے تے آزاد امیدواراں کوں تحریک انصاف دا رکن قرار ݙے ݙتا ویندے، ایاز صادق تاں صرف پارلیمان دی بالادستی دی ڳالھ کیتی اے جو کوئی وی ادارہ آئین دی من پسند تشریح کیویں کر سڳدے اتے پارلیمان دی بالادستی کمزور کرسڳدےَ عوام دے منتخب نمائنداں توں قانون سازی دا حق کوئی نئین کھس سڳدا، سپیکر قومی اسمبلی دا چیف الیکشن کمشنر کوں خط بالکل آئینی اتے بہترین اے، اساں پارلیمان دی بالادستی کیتے اپݨا کردار ادا کریندے رہسوں۔