سارے کٹھے تھی تے مارچ سمیت کجھ وی کر گھنن ،جڈاں تئیں میں زندہ ہم کہیں کوں این آر او کائناں ملسے ، وزیر اعظم عمران بابا گرونانک یونیورسٹی دا منڈھ بدھنڑ دی تقریب توں خطاب

ننکانہ صاحب ۔ 28 اکتوبر (اے پی پی) وزیر ا عظم عمرا ن خان آکھیے جو سارے کٹھے تھی تے مارچ سمیت کجھ وی کر گھنن جڈاں تئیں میں زندہ ہم کہیں کوں این آر او کائناں مسلی ،مدینہ دی ریاست ایں سانگے کامیاب ریاست تصور تھیندی پئی کیوں جو اتھاں قانون دی حکمرانی ہئی ، طبقاتی نظام اتے مراعات یافتہ طبقات دے ہوندے ہوئیں ملک اگی تے نی ودھ سگدا ،اقامہ منی لانڈرنگ دا ہک طریقہ اے ،وزیراعظم منتخب تھیونڑ دے عبد اپنڑی پہلی تقریراچ آکھیا ہئی جو ہک وقت آسی جڈاں ملک دا سارا کرپٹ مافیا کٹھا تھی ویسی ،ورلڈ بینک رپورٹ اچ آکھیے جو کاروبای سوکھ پیدا کرنڑ دے حوالے نال پاکستان برصغیر اچ پہلے تے دنیا اچ پنجویں نمبر تے وگے ، اپنڑے سارے وسائل تعلیم تے خرچ کریسوں کیوں جو علم دی بنیاد تے معیشت کوں استوار کرنڑ نال ہی ملک ترقی کریسی ،تعلیم دے بغیر کوئی معاشرہ ترقی نی کریندا ،وڈیاں وڈیاں درگاہیں نال جیرھیاں اوقاف دیاں زمیناں ہن انہاں تے یونیورسٹیاں بنڑیسوں ،اساں توں پچھیا گے جو تساں نواز شریف دی زندگی دی ضمانت ڈے سگدو میں تاں اکھینداں جو میں اپنڑی زندگی دی ضمانت وی نی ڈے سگدا ۔اساں نوا زشریف کوں بہترین طبی سہولتاں ڈیونڑ یقینی بنڑائے ۔اے گال وزیر اعظم عمران خان سنوار کوں بابا گرونانک یونیورسٹی دا منڈھ بدھنڑ دی تقریب نال خطاب کریندے ہوئیں آکھی اے ۔انہاں آکھیا جو پہلے چارٹرڈ آف ڈیموکریسی تے دستخط تھئے جیں دے نتیجے اچ ماضی دے حکمراناں ملک دا قرضہ 6 ہزار ارب توں 30 ہزار ارب تئیں پجا ڈتے ۔ اساڈی حکومت برسر اقتدار آتے اپنڑاں ادھا ٹیکس ریو نیو انہاں دے گھدے گے قرضے دیاں قسطاں ڈیونڑ تے خرچ کیتے ۔انہاں کوں پتہ ہئی جو ملک کنگال کرتے چھوڑ گن ۔تجارتی تے کرنٹ اکاﺅنٹ خساے اچ ودھارا تھئے ۔ آزادی مارچ آلیں کوں موجودہ حکومت دے کامیاب تھیونڑ دا ڈر اے ،کیا وجہ اے جو وزیراعظم توں استعفیٰ گھننڑ آندے پن ۔کتھائیں اکھیندن جو اے یہودی لابی اے ،کہیں جاہ اکھیندن جو یہودی قبضہ کرنڑ آندے پن تے کتھائیں اے قادیانیاں دی گال کریندن تے کتھائیں مہانگ دا ذکر کریندے ۔انہاں آکھیا جو تاریخ کٹھی کرتے ڈیکھن تاں پی ٹی آئی دے پہلے سال اچ ساریں توں گھٹ مہانگ تھئی اے ۔انہاں تے مقدمیں اساڈے دور اچ کائنی بنڑیے ۔انہاں آکھیا جو ماضی اچ ڈو این آر او تے گے ۔ ہک پرویز مشرف انہاں کوں سعودی عرب بھیجا تے ڈوجھا آصف زرداری کوں ڈتا گیا ۔انہاں آکھیا جو انہاں دیاں شاہ خرچیاں پاروں روپے دی قدر گھٹ تھئی تے ڈالر ودھ گیا تے درآمد چیزاں مہانگیاں تھیاں ۔وزیر اعظم یونیورسٹی دا منڈھ بدھنڑ تے وزیر اعلیٰ پنجاب اتے وزیر داخلہ کوں مبارخ ڈیندے ہوئیں آکھیا جو تساں بابا گرو ناناک دے 550 ویں جنم ڈینھ تے عملی قدم چاتے ۔ہک وقت ہئی اساں تعلیم اچ ساریں توں اگوں ہاسے ہنڑ ساریں توں پچھوں تھی گیا اساں اینکوں ترجیح نہ ڈتی ۔انہاں آکھیا یونیورسٹی دا قیام بہوں وڈا قدم اے ۔ انشاءاللہ اے ایجھی یونیورسٹی ہو سی جیں اچ دنیا دے لوک تے مقامی لوک سائنس اینڈ ٹیکنالوجی اتے انفارمیشن ٹیکنالوجی دی جدید تعلیم حاصل کر سگسن ۔ انہاں وزیر اعلیٰ پنجاب کوں الویندے ہوئیں آکھیا جو اوقاف دیاں جیرھیاں زمیناں تے قبضہ تھئے ایں ضمن اچ کرپشن تھیندی پئی اے ۔ بابا فرید دے مزار دے نال زمین سمیت بئے بزرگاں دے مزاراں دے نال یونیورسٹیاں اتے ہسپتال قائم کیتے ونجن ۔ انہاں آکھیا جو بابا فرید، بلھے شاہ، داتا صاحب اتے میاں محمد بخش جیھے اولیا کرام انسانیت دی خدمت کیتی تے انساناں دی محبت دا درس ڈتا ۔ نبی اکرمﷺ دنیا توں پردہ فرما گے تاں انہاں دی چھیکڑی پونجی وی لوکاں اچ ونڈ ڈتی گئی ۔مدینہ ونج تے ڈیکھو لوک آپ ﷺ نال کیویں عشق کریندن ۔ کرتار پور اتے ننکانہ صاحب دی حیثیت سکھ برادری کیتے اوہا اے جیرھی جو اساں کیتے مدینہ اتے مکہ دی اے، سعودی عرب نال کہیں ملک دی وی مخالفت ہووے او مسلماناں کوں مکے آونڑ توں نی روکیندے ۔مدارس دے بالاں کوں وی سائنسی تعلیم ڈیونڑیں اے ۔وزیر اعظم آکھیا جو آپ ﷺ دا فرمان اے جو اگر انہاں دی ڈھی وی جرم کریسی تاں اونکوں وی سزا ملسی ۔ وزیر اعظم آکھیا جو مدینہ دی ریاست اچ قانون دی بالادستی پہلا اصول ہئی ۔اساڈے نبی ﷺ رحمت اللعالمین ہن۔ وزیر اعظم آکھیا جو قانون اتے ریاست دی نظر اچ سارے برابر ہوونڑیں چاہیدن تے ساریں کیتے حقوق وی ہکو جہے ہوونڑیں چاہیدن ۔