سرگودھا۔8نومبر (اے پی پی) یونیورسٹی آف سرگودھا دے شعبہ کمیونیکیشن اینڈ میڈیا اسٹڈیز صحافتی اخلاقیات تے ہک بامعنی کمیونٹی انگیجمنٹ سیشن کرایا جئیں اچ منیجنگ ڈائریکٹر ایسوسی ایٹڈ پریس آف پاکستان ( اے پی پی ) محمد عاصم کھچی مزمان خصوصی دے طور شریک تھیے۔ اے تقریب یونیورسٹی دے کمیونیکیشن اینڈ میڈیا اسٹڈیز آڈیٹوریم اچ تھئی جئیں اچ سرگودھا ڈویژن دے ٹی وی اتے اخباری صحافیاں دے نال نال میڈیا اسٹڈیز دے طلباء وی موجود ہن۔ ورکنگ صحافیاں اتے میڈیا اسٹوڈنٹس توں خطاب کریندیں ہوئیں محمد عاصم کھچی معروضی، غیر جانبدار اتے حقائق تے مبنی صحافت دی اہمیت تے زور ݙتا۔ انہاں تفتیشی صحافت دی لوڑھ کوں اجاگر کیتا اتے شرکاء کوں جدید صحافت کیتے اکویویں صدی دی ضروری مہارتاں سکھݨ دی ترغیب ݙتی۔ انہاں ایں میدان اچ ابھردے ہوئے رجحانات جینویں مصنوعی ذہانت، ڈیٹا جرنلزم، بصری کہانی سناوݨ، اتے پیش گوئی دی صحافت کوں جدید صحافتی مہارتاں دے اہم اجزا قرار ݙتا۔ ایں موقع تے سوال و جواب دی نشست وی تھئی۔ ہک سوال دا جواب ݙیندیں ہوئیں عاصم کھچی معلومات کوں براہ راست ذرائع توں تصدیق کرݨ دی اہمیت تے زور ݙتا تانجو خبراں دی درستی یقینی ٻݨائی ونڄ سڳے۔ انہاں ݙسیا جو حکومت، صحافتی تنظیماں اتے میڈیا کونسلز وی فیک نیوز دی نشاندہی اتے مقابلہ کرݨ دی تربیت ݙیندی پئن۔ شعبہ کمیونیکیشن اینڈ میڈیا اسٹڈیز دے چیئرمین ڈاکٹر مدثر حسین شاہ یونیورسٹی آف سرگودھا اتے اے پی پی وچال صحافیاں دی استعداد کار ودھاوݨ کیتے آپسی تعاون دا اعلان کیتا۔ انہاں آکھیا جو اے یونیورسٹی دے وائس چانسلر پروفیسر ڈاکٹر قیصر عباس دا وژن اے جو سرکاری اتے غیر سرکاری اداریاں نال سانجھ نال صحافیاں کوں مصنوعی ذہانت، ڈیٹا جرنلزم، بصری ایڈیٹنگ، مواد دی تخلیق اتے سوشل میڈیا پروڈکشن اچ تیز رفتار تربیت ݙتی ونڄے تانجو پرے دے علاقیاں اچ کم کرݨ آلے صحافی آپݨے پیشہ وارانہ اتے مالی حالات کوں بہتر کر سڳن۔ ایں توں پہلے افتتاحی کلمات اچ اسسٹنٹ پروفیسر نعمان یاسر کمیونٹی انگیجمنٹ کوں ہک بامعنی عمل قرار ݙتا اتے اینکوں انڈسٹری اتے اکیڈمیہ وچال ایجھا ربط قرار ݙتا جئیں نال ݙوہیں فریق فیدہ چا سڳدن۔ تقریب دی نظامت اسسٹنٹ پروفیسر ڈاکٹر عبد الرحمن قیصر کیتی جئیں اچ ٹی وی اتے اخباری صحافیاں دی وݙی تعداد ایںدے اچ شرکت کیتی۔
منیجنگ ڈائریکٹر اے پی پی محمد عاصم کھچی دی یونیورسٹی آف سرگودھا دے شعبہ کمیونیکیشن اینڈ میڈیا اسٹڈیز ولوں صحافتی اخلاقیات تے ہک بامعنی کمیونٹی انگیجمنٹ سیشن اچ شرکت
مضمون کا ماخذ : لاٹری کی قانونی حیثیت
متعلقہ مضامین
