اسلام آباد۔23اکتوبر(اے پی پی) چیئرمین سینیٹ سید یوسف رضا گیلانی بیگم نصرت بھٹو دی برسی تے انھاں دی سیاسی تے سماجی خدمات تے خراج عقیدت پیش کیتے۔ سینٹ سیکرٹریٹ توں جاری بیان اچ سید یوسف رضا گیلانی آکھیے قوم بیگم نصرت بھٹو دی سیاسی اتے سماجی خدمات کوں ہمیشہ یاد رکھیسی ۔انہاں آکھیے بیگم نصرت بھٹو ھک نڈر تریمت ہن ، پاکستان اچ جمہوریت دے ودھارے سانڳےانھاں دیاں قربانیاں بھلائیاں نی ونڄ سڳدیاں تے انھاں دی ایں خدمات پاروں قوم انھاں کوں مادر جمہوریت جیھے خطاب نال نوازیے ، بیگم نصرت بھٹو جیں بہادری توں مارشل لادے تاریک دور دا سامݨا کیتا تاریخ اچ ایندی مثال نی ملدی ۔ چیئرمین سینیٹ آکھیے بیگم نصرت بھٹو اے ثابت کرݙتا جو جذبے تے پکے ارادے نال اوکھے توں اوکھے دور دا وی ڈٹ تے سامݨا کیتا ونڄ سڳدے ۔ انھاں مزید آکھیے بیگم نصرت بھٹو دی زندگی ایں قوم دیاں تریمتاں سانڳے مشعل راہ اے۔
