اسلام آباد۔22ستمبر(اے پی پی) وزیراعظم محمد شہباز شریف 23 توں 27 ستمبر کوں نیویارک اچ اقوام متحدہ دی جنرل اسمبلی دے 79ویں اعلیٰ سطحی اجلاس اچ شرکت کریسن ۔ ترجمان دفتر خارجہ توں جاری اعلامیہ موجب وزیر اعظم 27 ستمبر کوں اقوام متحدہ دی جنرل اسمبلی توں خطاب اچ عالمی امن، سلامتی اتے خوشحالی دے ودھارے سانڳے اقوام متحدہ دےکثیرالجہتی کردار دی حمایت اتے پاکستان دے مستحکم عزم دا اعادہ کریسن ۔ وزیراعظم اقوام متحدہ دی سلامتی کونسل دے ایجنڈے اچ شامل مسئلہ فلسطین اتے جموں و کشمیر دے جھیڑے سودھے پراݨے مسئلیں کوں حل کرݨ دی اہمیت تے زور ݙیسن ۔ وزیراعظم بین الاقوامی اقتصادی تعلقات اچ عدم مساوات کوں دور کرݨ تے بین الاقوامی مالیاتی ڈھانچے اچ اصلاحات دی اہمیت کوں اجاگر کرݨ دے نال نال عالمی برادری تے زور ݙیسن جو او موسمیاتی تبدیلیاں نال نبݨݨ تے اسلامو فوبیا دی ودھدی لہر دا مقابلہ کرݨ سانڳے فیصلہ کن اقدامات کرے۔وزیراعظم اقوام متحدہ دی جنرل اسمبلی دے اجلاس دے موقع تے کئی اعلیٰ سطحی اجلاساں اچ شرکت وی کریسن جنھاں اچ “سطح سمندر اچ ودھارے توں لاحق خطرات تے اعلیٰ سطحی میٹنگ” اتے “امن سانڳے قیادت” تے اقوام متحدہ دی سلامتی کونسل دی کھلی بحث شامل اے۔ وزیراعظم پائیدار ترقی دے ایجنڈے کوں اڳوں ودھاوݨ سانڳے عالمی سطح تے درکار اقدامات تے ڳالھ مہاڑ سانڳے عالمی رہنماواں دے ھک گروپ نال ڳالھ مہاڑ کریسن ۔وزیراعظم دے پروگرام اچ اقوام متحدہ دے سیکرٹری جنرل تے جنرل اسمبلی دے صدر سودھے ٻہوں سارے عالمی رہنماؤاں نال ݙو پساے ملاقاتاں وی شامل ہن۔ اقوام متحدہ دی جنرل اسمبلی دا اعلیٰ سطحی اجلاس پاکستان سانڳے علاقائی اتے بین الاقوامی اہمیت دے اہم مسئلیں تے آپݨے نقطہ نظر کوں اجاگر کرݨ سانڳے ھک اہم پلیٹ فارم پیش کریندے ۔ وزیر اعظم پاکستان دی ترجیحات کوں اجاگر کریسن تاں جو عوام کوں ملکی تے عالمی ترقی دے ایجنڈے دے مرکزی مقام اچ رکھیا ۔ وزیراعظم محمد شہباز شریف 26-2025 سانڳے اقوام متحدہ دی سلامتی کونسل دے آندے رکن دے طور تے، اقوام متحدہ دے چارٹر کوں برقرار رکھݨ، جھیڑے روکݨ ، امن اتے عالمی خوشحالی کوں ودھارا ݙیوݨ سانڳے اقوام متحدہ دے سارے رکن ملکاں نال رل تے کم کرݨ سانڳے پاکستان دے عزم دا اظہار وی کریسن
