لاہور۔21ستمبر(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے ناکامیاں پی ٹی آئی دا مقدر بݨ ڳئن ، جلسے متعلق ٻہوں ٻڑکاں ماریاں ڳئن ، پورا زور لاوݨ دے باوجود جلسے سانڳے لوک جمع نی کرسڳیے ،عوام انھاں کوں مسترد کرݙتے۔ پی ٹی آئی دے جلسہ تے ڳالھ کریندے وفاقی وزیر اطلاعات آکھیے پی ٹی آئی لاہور جلسے دے حوالے نال وݙیاں ڳالھیں کیتیاں تے ٻڑکاں ماریاں ، جیں طریقے نال انھاں دا اسلام آباد دا جلسہ فلاپ تھئے ایویں اڄ لاہور دا جلسہ وی فلاپ تھی ڳئے ۔ انھاں اسلام آباد جلسے اچ آکھیا ہئی جو اساں پوری تیاری نال لاہور امسوں ، خبردار اتے ہوشیار دے نعرے لاتے ڳئے ، اڄ لاہور دی ہر سڑک کھلی ہئی، پشاور توں علی امین گنڈاپور لاہور سانڳے روانہ تھئے تاں ایم ون توں ایم ٹو موٹر وے تے آئے، کہیں جاہ تے کوئی رکاوٹ کھڑی نی کیتی ڳئی ، اٹک اتے میانوالی سودھے ٻئے علاقیں توں جلسہ سانڳے روٹ کھلا رکھیا ڳیا ، اتنی تیاری اتے ویلھا ملݨ دے بعد اے پورا زور لاتے پاکستان توں چند لوک کٹھے نی کر سڳیے جیوں اسلام آباد جلسے اچ ناکام رہیے، ایویں لاہور جلسے اچ وی ناکامی ملی، عوام انھاں دے جلسیں کوں مسترد کرݙتے ۔ مہانگ 9.6 فیصد تے آ چکی اے، انھاں دے آپݨے لوک منیندن جو مہانگ گھٹ تھئی اے ، 2018ءاچ نواز شریف دے دور اچ مہانگ 4 فیصد تے ہئی جیڑھی پی ٹی آئی دے دور اچ ڈٻل ڈیجیٹ تے ڳئی ۔ اے کیڑھی ڳالھ تے احتجاج کریندے پئن ، سڑکاں خالی ہن، روٹ کھلئے پئن ،اساں انھاں کوں فری ہینڈ ݙتا جو تساں آو تے جلسہ کرو ، انھاں کوں جلسے دی جاہ ݙتی ، سیکورٹی ݙتی ساریاں سہولتاں دے باوجود اے ناکام رہیے۔ اڄ دنیا دے وݙے مالیاتی ادارے آکھدے پئن جو پاکستان دی معیشت ٹیک آف کریندی پئی اے اڄ بلومبرگ اچ ھک آرٹیکل شائع تھئے جو پاکستان دی اسٹاک مارکیٹ ایشیاءدی ایمرجنگ مارکیٹس اچ شمار تھیندی اے ، اسٹاک ایکسچینج اچ تیزی ݙٹھی ڳئی ، فچ اتے موڈیز دی ریٹنگ بہتر تھئن، مہانگ صرف گھٹی کائنی بلکہ ساݙی برآمدات 14 فیصد ودھ ڳئن ، کرنٹ اکاؤنٹ خسارہ گھٹ ڳئے تے شرح سود گھٹی ، پالیسی ریٹ تلے آئے ، ایہا وجہ اے جو عوام انھاں دے جلسے کوں مسترد کرݙتے ۔ پی ٹی آئی دے لیڈرز بنیادی طورتے ݙریے پئن تے چاہندن جو اے ملک ترقی نہ کرے، انھاں آئی ایم ایف کوں خط لکھیے، ملک کوں ڈیفالٹ کرݨ دیاں دعاواں منگدے رہیے ، آئی ایم ایف دے دفتر دے باہروں احتجاج کیتے کیوں جو انھاں دی خواہش ہئی معیشت ترقی نہ کرے، انھاں دے دور اچ معاشی تنزلی تھئی انھاں دی ہمیشہ توں خواہش رہی اے جو ملک اچ تباہی، بربادی تے انارکی کھنڈائی ونڄے ، اے ترقی دا سفر روکݨ چاہندن ۔ لاہور اتے اسلام آباد جلسیں سودھے انھاں دیاں ساریاں پریس کانفرنساں دا ھک ہی مقصد ہوندے جو ساݙے لیڈر کوں چھوڑو ، اے این آر او گھنݨ دی کوشش کریندے پئن لیکن این آر او نہ ملسی تساکوں کیساں دا سامݨا کرݨا پوسی ، 9 مئی تے 190 ملین پاؤنڈ کرپشن کیسز دا جواب ݙیوݨا ہوسی ، انھاں دی ناکامی کھل تے سامنے آ چکی اے، انھاں دے جلسے اچ لوک نی آندے پئے ۔ انھاں آپݨے ضلعیں اچ باقاعدہ ٹرانسپورٹ دی سہولت ݙتی تے خالی بساں جلسہ گاہ اچ پڄاں ، ناکامی پی ٹی آئی دا مقدر بݨ چکی اے انھاں ٻڑکاں ماریاں ہن تے دعوے کیتے ہن اڄ انھاں دے سارے دعوے دھرے رہ ڳئن وفاقی وزیر آکھیے علی امین گنڈاپورجیڑھی زبان استعمال کیتی ایندے بعد انھاں آکھیے اساں پنجاب ویندے پیوں ، پنجاب دے لوک مہمان نواز لوک ہن ، پنجاب آپݨی روایت قائم رکھی، اڄ پنجاب دیاں ساریاں سڑکاں کھلیاں رہیاں سیکورٹی وی ݙتی ڳئی لیکن افسوس جو انھاں جتنیاں وݙیاں ٻڑکاں ماریاں ڳالھیں کیتیاں کھٹیا پہاڑ تے نکلیا چوہا او وی مریا ہویا ۔ وفاقی وزیر اطلاعات آکھیے علی امین گنڈاپور کوں ݙوواری ناکامی تھی چکی اے انھاں کوں جلسے دی اجازت ݙتی ڳئی ، سیکورٹی ݙتی ڳئی ، جلسہ گاہ ݙتی ڳئی ، ساریاں سہولتاں ݙتیاں ڳیاں لیکن ول وی ناکام تھئے علی امین گنڈاپور ݙوجھی واری ناکام جلسہ کیتے تساں کیڑھی ڳالھ دے وزیراعلیٰ ہیوے جو تساں ہر محاذ تے ناکام تھیندے پیو ، تساں پنجاب نال موازنہ کرو، اللہ دا شکر اے مریم نواز پنجاب دے اندر صحت، تعلیم، انفراسٹرکچر سودھے ہر شعبہ اچ بہترین کم کریندیاں پئن ، او ھک مناسب انتظامی انفراسٹرکچر گھن آئن ، پنجاب اچ ترقیاتی منصوبے چلدے پئن ، سماجی شعبہ ترقی کریندا پئے نویں ہسپتال اتے یونیورسٹیاں بݨدیاں پئن نواز شریف دی قیادت اچ محمد شہباز شریف ݙاہ سال پنجاب اچ نویں ریکارڈ بݨائے ، شہباز شریف مہانگ مکائی ، ملکی برآمدات ودھائن ، معاملات بہتر تھئن تے اساں بہتری آلے پاسے ویندے پیوں ۔ وفاق اتے پنجاب بجلی ٻلاں تے سبسڈی ݙتی۔ مریم نواز اپݨی گورننس دے اندر اعلیٰ معیار بݨائے پوری دنیا ݙیکھدی پئی اے جو او کیڑھے طریقے نال نویں منصوبے گھن آندیاں پئن او آپݨے صوبے دے عوام دی فلاح بہبود سانڳے منصوبے شروع کریندیاں پئن ، علی امین گنڈاپور دے جلسے اتے سیاست وی ناکام ہن انھاں دی گورننس وی ناکام، تساڈی ساڈھے 12 سال توں خیبر پختونخوا اچ حکومت اے، تساکوں کیں روکیا ہئی جو تساں ایجوکیشن تے توجہ نہ ݙیو، تساں ایجوکیشن دا ھک وݙا منصوبہ یا وݙی یونیورسٹی ݙسا ݙیو ، کوئی وݙا ہسپتال ݙسا ݙیو جیڑھا تساں بݨائے ھک وݙا ڈیم ݙساؤ جیڑھا توڑ پڄا ہووے تے جیں دا پاکستان دی عوام کوں فیدہ تھیندا پیا ہووے ساڈھے 12 سال دی خیبر پختونخوا دی ناکام حکومت دا عوام دی فلاح و بہبود سانڳے کوئی وݙا پروجیکٹ کائنی ، خیبر پختونخوا دے عوام دا وی حق اے جو انہاں سانڳے منصوبے لاتے ونڄن انھاں کوں تعلیم تے صحت دیاں سہولتاں ݙتیاں ونڄن صوبے اچ ترقی تھیوے ، خیبر پختونخوا وی ساݙا صوبہ اے، اتھاں ساݙے بھرا ہن اساکوں انھاں نال پیار اے اساں چاہندوں اے ترقی دا دور پورے ملک اچ کھنڈے مگر جنھاں ہتھاں اچ خیبر پختونخوا دی حکومت اے اوسیاسی طور تے وی ناکام تھی چکئن تے آپݨی پارٹی کوں وی ناکامی توں ݙوچار کریندے پئن ، وزیراعلیٰ خیبر پختونخوا دی صوبے دے معاملات چلاوݨ تے فوکس تے صلاحیت کائنی ، خیبر پختونخوا دے عوام نال وزیراعلیٰ دے ہتھوں ٻہوں خراب سلوک تھیندا پئے کاش انھاں سپورٹس سانڳے کجھ کیتا ہوندا کوئی ٹیلنٹ ہنٹ پروگرام شروع کیتا ہوندا سیاسی طورتے وی ناکام ہن انتظامی طور تے وی اڄ دے فلاپ جلسے دے بعد اے ول جلسہ کرݨ دی جرات نہ کریسن ۔ وفاقی وزیر آکھیے وزیراعلیٰ خیبر پختونخوا اپݨے عوام تے توجہ ݙیون ، ٻڑکاں مارݨ چھوڑ ݙیوݨ بدتمیزی کرݨ تے بدزبانی چھوڑن عوام دی خدمت کرن، جیں عوام اساکوں مینڈیٹ ݙتے ۔ وفاقی وزیر آکھیے لطیف کھوسہ دی طرفوں اداریں دے خلاف ہرزہ سرائی قابل مذمت اے، ھک سینئر وکیل کوں زیب نی ݙیندا جو او چیف جسٹس دے خلاف غلیظ زبان استعمال کرن اساں ایندی مذمت کریندوں اے توہین عدالت دے مترادف اے ایندا نوٹس گھنݨا چاہیدے آندے ݙینھاں اچ معیشت بہتر تھیسی ساݙی کوشش اے مہانگ ٻئی گھٹے ایندے اثرات پاکستان اچ عوام دے دروازے تے پجن ۔ ان شاءاللہ معیشت ٹیک آف کریسی ، ہر شہری خوشحال تھیسی ، ھک مستحکم پاکستان ساݙا عزم اے، عزم استحکام ساݙا وژن اے، ملک اچ وی امن قائم کریسوں تے معیشت کوں وی ترقی ݙیسوں ساݙی معیشت آندے وقتاں اچ دنیا دی ابھردی معیشت اچ شامل ہوسی تے بہترین ملکاں دی معیشت دے برابر کھڑی ہوسی۔
