اسلام آباد۔5ستمبر(اے پی پی) معروف عالمی ٹیکنالوجی کمپنی گوگل پاکستان اچ 5 لکھ کروم بکس تیار کرݨ دے اقدام دا آغاز کرݙتے ، ایں موقع تے وزیراعظم محمد شہباز شریف کوں پہلی کروم بک پیش کیتی ڳئی ۔ خمیس کوں’’اے گوگل پاکستان اڳوں ودھو ‘‘دی تقریب توں خطاب کریندے وزیراعظم محمد شہباز شریف عالمی سطح تے اتے پاکستان اچ گوگل دے تعاون دی تعریف کریندے ایندی شراکت داری اتے خدمات لائق تحسین اے۔ انہاں آکھیے ملک دی نینگر نسل انفارمیشن ٹیکنالوجی دے شعبے اچ ٻہوں زیادہ قابل اے جیڑھا جو پاکستان دی معاشی ترقی اچ کلیدی کردار نبھا سڳدی اے ، وفاقی اتے صوبائی حکومتاں آپݨی تعلیم اتے بااختیار بݨاوݨ سانڳے سارے ممکنہ وسائل بروئے کار گھن آون ۔وزیراعظم آکھیے حکومت اڳلے پنج سالاں اچ آئی ٹی ایکسپورٹ دا ہدف 25 ارب ڈالر مقرر کیتے جیڑھا ڳھدا ونڄ سڳدے ۔ انھاں آئی ٹی ماہرین اتے صنعتکاراں کوں آکھیے جو او چھوٹے تے درمیانے درجے دے کاروباری اداریں تے فری لانسرز کوں ودھارا ݙیوݨ دے نال نال ہدف گھنݨ اچ حکومت دی مدد سانڳے ھک منصوبہ پیش کرن۔وزیر اعظم شہباز شریف پاکستان دے عوام دے بہترین مفاد اچ وݙے پیمانے تے بدعنوانی توں نجات سانڳے ملک دے گورننس سسٹم کوں مکمل طور تے پیپر لیس اتے ڈیجیٹلائز کرݨ دا عزم کیتے ، انھاں آکھیے حکومت شفاف طریقے نال آئی ٹی اتے ٹیلی کمیونیکیشن دی وزارت سانڳے ھک نویں سیکرٹری دی خدمات ڳھدن وزیر مملکت انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے پاکستان اچ گوگل دی خدمات لائق تحسین ہن، گوگل وزیراعظم شہباز شریف دے وژن دے تحت پاکستان دی ڈیجیٹلائزیشن اچ اہم کردار نبھیندا پئے ، مصنوعی ذہانت اتے ڈیجیٹائزیشن توں اساں اہداف گھن سڳدوں ، اساں آپݨے نینگراں کوں ہنرمند بݨاوݨاں اے ، 75 ہزار آئی ٹی گریجویٹس دی فنی صلاحیتاں کوں مزید تکڑا کرݨا اے گوگل پاکستان دے کنٹری ڈائریکٹر فرحان قریشی تقریب توں خطاب اچ آکھیے انفارمیشن ٹیکنالوجی تے توجہ ݙیوݨ نال ملک اچ معاشی سرگرمیاں ودھاوݨ اچ مدد ملسی ، انھاں ایں ڳالھ تے روشنی پاتی جو پاکستان اچ فری لانسرز سانڳے ٹیکنالوجی دے مختلف شعبیں اچ اڳوں ودھݨ دے ٻہوں موقع موجود ہن ، گوگل ڈیٹا اینالیٹکس، مصنوعی ذہانت اتے سائبر سکیورٹی تے 4 توں 6 مہینے دے کورس کرویندا پئے ، ایں موقع تے وفاقی وزیر اطلاعات و نشریات عطاء اللہ تارڑ تے وفاقی وزیر منصوبہ بندی و ترقی احسن اقبال وی موجود ہن۔ایں موقع تے گوگل دے اے پی اے سی ریجن دے صدر سکاٹ بیو مونٹ وزیراعظم کوں مقامی طور تے تیار کیتی ڳئی پہلی کروم بک پیش کیتی
