اسلام آباد۔5ستمبر (اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے معاشی ترقی سانڳے استحکام ضروری اے، مسلم لیگ (ن) ہمیشہ ملک اچ کاروبار دوست ماحول سانڳے رستہ ہموار کیتے، ساݙی توجہ ملک اچ محفوظ کاروبار دوست ماحول یقینی بݨاوݨ اے اے ڳالھ انھاں مقامی ہوٹل اچ سی ای او سمٹ اتے 100 سی ای او اینڈ ڈپلومیٹس کتاب دے اجراءدی تقریب توں آکھی وفاقی وزیر اطلاعات آکھیے جݙاں وی اساکوں حکومت اچ آوݨ دا موقع ملیے ، کاروباری برادری ساݙی کاروبار دوست پالیسیاں توں فیدہ چاتا ۔ 2018ء اچ جݙاں اساں حکومت چھوڑ تے ڳئے تاں ترقی دی شرح 5.8 فیصد ہئی جیں دا تخمینہ 6.4 فیصد لاتا ویندا پیا ہئی اوں ویلھے مہانگ صرف 4 فیصد تے ہئی ، ملک اچ براہ راست ٻاہرلی سرمایہ کاری آندی پئی ہئی ، چین سی پیک منصوبے دے تحت تقریباً 70 ارب ڈالر دی سرمایہ کاری کیتی، ایں ویلھے سارے عالمی مالیاتی جریدے اتے ادارے پیشنگوئی کریندے پئے ہن جو پاکستان آندے چھی یا ست سالاں اچ جی 20 اچ رل ویسی اساں اوں ویلھے جی 20 تئیں پڄ ڳئے ہاسے ساݙی اولین توجہ ملک اچ محفوظ ماحول یقینی بݨاوݨ تے ہئی اساکوں ساریں توں وݙا چیلنج توانائی بحران دا ہئی ہرسال توانائی دے بحران پاروں 500 ارب روپے دا ضیان تھیندا پیا ہئی ، اوں ویلھے 18 توں 20 گھنٹے لوڈ شیڈنگ تھیندی پئی ہئی پرائیویٹ اتے پبلک سیکٹرز دے تعاون نال توانائی دے موثر پلانٹس لاتے ڳئے، اساں 20 گھنٹے دی لوڈ شیڈنگ ختم کرتے زیرو تے گھن آئے اساں توانائی دا بحران مکایا اے کوئی سوکھا کم نہ ہئی اساں آپݨا وعدہ پورا کیتا ، ݙوجھا وݙا چیلنج ملک دی سیکورٹی صورتحال ہئی، ملک دا کمرشل حب کراچی غیر محفوظ ہئی، کراچی اچ امن دی بحالی ساݙا پکا عزم ہئی ، سیکورٹی فورسز دی مدد نال کراچی سودھے ملک دے ٻئے حصیں اچ نیشنل ایکشن پلان تے کم شروع کیتا ، انھاں چار سالاں اچ ملک اچ امن و امان دی صورتحال چنڳی تھئی ، پچھلی حکومت اچ اساکوں ڈیفالٹ دا خطرہ ہئی، ایں ویلھے ایکسپورٹرز کوں کرنسی دے ریٹ اچ لہہ چڑھ پاروں اوکھ دا سامݨا ہئی، حکومت دیاں چنڳیاں پالیسیاں دے نتیجے اچ اعتماد دی فضاءبحال تھئی تے ملک ڈیفالٹ دے خطرے توں ٻاہر آیا، اساں ملک تے قوم دی فلاح دی خاطر اپݨی سیاست دی قربانی ݙتی تے کاروبار دوست پالیسیاں کوں ودھارا ݙتا ، ملک اچ اعتماد دی فضاءکوں پروان چڑھایا، ملکی ترقی سانڳے پالیسیاں بݨائیاں ساݙا یقین اے جو استحکام دے بغیر معاشی ترقی ممکن کائنی ۔ وفاقی وزیر اطلاعات آکھیے اساکوں ففتھ جنریشن وار دا چیلنج اے، غلط اتے نقلی خبراں ملکی معیشت کوں ضیان پڄیندن ، مس انفارمیشن، پروپیگنڈے اتے نقلی خبراں دا مقابلہ کرݨ سانڳے محفوظ ماحول بݨاوݨ ناگزیر اے۔ حکومت دا کم کاروبار کرݨ کائنی ، حکومت رائٹ سائزنگ اتے ڈاﺅن سائزنگ دی پالیسی تے کم شروع کیتے ، ایجھے سرکاری ادارے موجود ہن جیڑھے صرف ٹیکس دہندگان دے پیسے تے چلدن ، معیشت اچ انھاں دا کوئی حصہ کائنی ، ایندی ھک مثال پبلک ورکس ڈیپارٹمنٹ اے جیں اچ ہر سال 100 ارب روپے دا ضیان تھیندا پیا ہئی حکومت ایں محکمے کوں بند کر دا جرأت مندانہ قدم چاتے، رائٹ سائزنگ اتے ڈائون سائزنگ تے کمیٹی کم کریندی پئی اے ۔ وفاقی وزیر آکھیے ایف بی آر دے پورے نظام کوں ڈیجیٹلائز کیتا ویندا پئے ، دنیا دی ممتاز فرم مکینزی کارپوریشن ملینڈا گیٹس فائونڈیشن دی فنڈنگ توں ایف بی آر دی ڈیجیٹلائزیشن تے کم کریندی پئی اے ، ایف بی آر دی ڈیجیٹلائزیشن دے بعد فائلرز دی تعداد ودھ ویسی عطاءاللہ تارڑ آکھیے جݙاں وی کوئی آفت آندی اے تاں کاروباری برادری کوں اوکھ تھیندی اے ۔ ملک اچ کاروباری سوکھ دی حوصلہ افزائی کیتی ویندی پئی اے ، کاروباری سوکھ دے بغیر ملک ترقی نی کرسڳدا
