آندے سال تئیں کاروبار تے گھراں دی تعمیر کیتے ھک ہزار ارب روپے دے بلاسودقرضے ݙتے ویسن ،اساں کنے جتنازیادہ پیسہ جمع تھیسی عوام تے اتنا ہی زیادہ خرچ کریسوں ، وزیراعظم دا فیصل مسیت اچ بلاسود قرضیں دے اجرا دی تقریب توں خطاب

اسلام آباد۔2مارچ (اے پی پی):وزیراعظم عمران خان آکھیے جو آندے سال تئیں 45لکھ خانداناں کوں آپݨے کاروبار شروع کرݨ تے گھراں دی تعمیر کیتے ھک ہزارارب روپے دے بلاسودقرضے ݙتے ویسن ، گھراں دی تعمیر کیتے بینکاں ہݨ تئیں 45 ارب روپے دے قرضے ݙتن ، ماضی ایندی مثال نی ملدی، اڄوکے مہینے دے چھیکڑ تئیں پنجاب دے ہر خاندان صحت کارڈ ہوسی جیں دے ذریعے او کہیں وی سرکاری و نجی ہسپتال توں آپݨا علاج کراسڳسن ، جتنا زیادہ ٹیکس جمع تھیسی حکومت عوام دی فلاح بہبود تے مزید خرچ کریسی ،پاکستان کوں ایں رستے پاݙتے جیں دا خواب علامہ اقبال ݙٹھا ہئی ۔ اے ڳالھ انہاں ٻدھ کوں کامیاب پاکستان پروگرام دے تحت فیصل مسیت اچ بلاسود قرضیں دے اجرا دی تقریب توں خطاب کریندے ہوئیں آکھی اے ،وزیراعظم آکھیے جو پاکستان دے قیام دا مقصد ھک مثالی اسلامی فلاحی ریاست قائم کرݨ ہئی ۔ نبی کریم ﷺ مدینے دی جیڑھی مثالی ریاست قائم کیتی ایندے اچ کوئی قانون توں بالا تر نہ ہئی اتے ریاست معاشرے دے کمزور طبقے دی ذمہ واری ڳھدی ہئی۔ بدقسمتی ٹوں اساں ایں نظریے توں روگردانی دی جیڑھی جو قیام پاکستان دی بنیاد ہئی ،دنیا دے کئی غیر اسلامی ملکاں ریاست مدینہ دے زریں اصولاں کوں آپنا تے ترقی تے خوشحالی دی شاہراہ تے گامزن تھی ڳئے جݙاں جو مسلمان انہاں کوں ترک کرتے زوال دا شکار تھی ڳئے ۔ وزیراعظم آکھیے جو ایف بی آر ریکارڈ ٹیکس جمع کیتے ۔ حکومت عوام کوں ریلیف ݙیوݨ کیتے پٹرول اتے بجلی دیاں قیمتاں اچ کمی کیتی اے جݙاں جو دنیا اچ ایندیاں قیمتاں اتے ویندیاں پئن ۔ اساں کنے جتنا زیادہ پیسہ جمع تھیسی عوام تے اتنا ہی خرچ کریسوں تے ریلیف ݙیسوں ۔ وزیراعظم آکھیے جو 45 لکھ خانداناں کوں بلا سود قرضیں دی فراہمی شروع کیتی اے ایندا آغاز پسماندہ علاقیں توں کیتے ، دیہات اچ ساڈھے 3 لکھ روپے تئیں جݙاں جو شہران اچ 5 لاکھ روپے تئیں بلا سود قرضے ݙتے ویسن تاں جو لوک آپݨا روزگار کماوݨ دے قابل تھی سڳن ۔ گھر دی تعمیر کیتے 20 لکھ روپے قرض ݙتا ویسی ۔ حکومت نینگراں کوں مختلف ہنر سکھیسی تاں جو او آپݨا روزگار کماوݨ دے قابل تھی سڳن ، انہاں آکھیے جو آئی ٹی دے شعبہ اچ ٻہوں سارے موقع موجود ہن ، نوجوان 6 توں 12مہینے اچ آئی ٹی دی ضروری تربیت ݙتی ونڄ سڳدی اے ۔ وزیراعظم آکھیے جو اڳلے سال تئیں 45 لکھ خانداناں کوں ھک ہزار ارب روپے دے قرضٖ ݙتے ویسن ۔ حکومت دے اقدامات دا مقصد عوام کوں آپݨے پیراں تے کھڑا کرݨا اے تاں جو لوک آپݨا روزگار کماوݨ دے قابل تھی سڳن کیوں جو حکومت کہیں کوں ملازمت نی ݙے سڳدی ۔ وزیراعظم آکھیے جو آپݨے گھر دی تعمیر ہربندے دا خواب ہوندے ، بینک پہلے عام آدمی کوں قرضے نہ ݙیندے ہن تے صرف پیسے آلے لوکہی اپݨا گھر تعمیر کرسڳدے ہن ۔ وݙی تعداد اچ لوک کچی آبادیاں اچ رہندن ۔ کراچی اچ 40 فیصد لوک کچی آبادیاں دے رہائشی ہین۔ حکومتی اقدامات توں بینک دا تنخواہ دار طبقے کوں گھر بݨاوݨ کیتے قرضے ݙیندے پئن ۔ 55 ارب روپے دے قرضے ہݨ تئیں ݙتے ڳئن ۔ ماضی اچ ایندی مثال نی ملدی ۔ حکومت گھر دی تعمیر کیتے قرضے دے سبسڈی ݙیندی پئی اے تاں جو عام بندے تے گھٹ ٻوجھ پووے ،وزیر اعظم آکھیے جو پنجاب اچ اڄوکے مہینے دے چھیکڑ تئیں ہر خاندان کنے ہیلتھ کارڈ ہوسی جیں دے ذریعے او کہیں وی سرکاری یا پرائیویٹ ہسپتال توں آپݨا علاج کرا سڳسی ،کامیاب پاکستان پروگرام مواخات مدینہ دی طرز تے کم کریندا پئے تے وزیر اعظم دے وژن دا عکاس اے۔